Давсны тухай мэдээлэл, сурталчилгааны 7 хоног "Эрүүл зүрхний төлөө давсаа багасгацгаая" уриан дор эхэллээ. Давс хэтрүүлэн хэрэглэх нь зүрх судасны өвчин, тархины цус харвалт, чихрийн шижин болон зарим төрлийн хорт хавдраар өвчлөх шалтгаан болж байна. 

Монголд 2019 онд хийсэн “Халдварт бус өвчин, осол гэмтлийн шалтгаан, эрсдэлт хүчин зүйлсийн тархалтын үндэсний IV судалгаа”-гаар нийт хүн амын давсны дундаж хэрэглээ 10.5 г байв. Үүнийг 2013 оны судалгаатай харьцуулахад үндэсний хэмжээнд 0.6 г, баруун бүсэд 5.1 г, Улаанбаатар хотод 1.2 г-аар багасжээ. Гэвч монгол хүний хоногт хэрэглэдэг давсны хэмжээ ДЭМБ-ын зөвлөмж хэмжээнээс 2 дахин их хэвээр байна.