Монгол Улсын Засгийн газар, МҮХАҮТ хамтран жил бүр уламжлал болгон тодруулдаг Монгол Улсын “ТОП 100 аж ахуйн нэгж”-ийн шалгаруулалтад ХААН Банк хоёрдугаарт эрэмбэлэгдлээ.

Энэхүү нэр хүндтэй шалгаруулалтыг зарласнаас хойш 20 гаруй жилийн турш ХААН Банк тэргүүлэгчдийн эгнээнд тогтмол нэрлэгдэж ирсэн бөгөөд сүүлийн таван жил дараалан эхний 4-т шалгараад байсан бол энэ жил анх удаагаа аман хүзүүнд эрэмбэлэгдлээ. ХААН Банк нь 2022 онд нийт 241.5 тэрбум төгрөгийг татварт төлж, Монгол Улсын төсвийн орлого бүрдүүлэхэд хувь нэмрээ оруулж ажиллалаа.

“ТОП 100 аж ахуйн нэгж”-ийг шалгаруулахдаа ААН-ийн тухайн жилийн орлого, улсын төсөвт оруулсан татвар, нийгмийн даатгал төлсөн ажиллагсдын тоо, ашиг, хөрөнгийн хэмжээ гэсэн үндсэн таван үзүүлэлтийг чухалчилдаг төдийгүй харьяа яам, холбогдох төр засгийн байгууллагын статистик мэдээлэлд үндэслэдэг. Иймээс ч улсын татварын орлогын дийлэнхийг нуруундаа үүрдэг эдгээр 100 аж ахуйн нэгжийг Монгол Улсын эдийн засгийн гол хөдөлгөгч хүч хэмээн зүй ёсоор нэрлэдэг билээ.

Энэ жилийн хувьд цар тахлын дараах эдийн засгийн сэргэлтийн эхэн үеийн бизнесийн нөхцөл байдлыг харуулж байгаагаараа ач холбогдолтой төдийгүй зөвхөн хувийн хэвшлийн байгууллагуудыг эрэмбэлэн өргөмжилж буйгаараа өмнөх жилүүдээс онцлогтой болж байна.

Бид харилцагчдадаа банк санхүүгийн үйлчилгээг зайнаас, цахимаар хурдан шуурхай авах боломжийг бүрдүүлж, цахим шилжилтийг түүчээлж буй төдийгүй жижиг, дунд бизнес эрхлэгчдээ дэмжин ажиллалаа. Түүнчлэн банкны үйлчилгээг шуурхай хүргэх, харилцагчийн үйлчилгээг өндөр түвшинд гаргах чиглэлд шат дараалсан ажлуудыг хийж, тогтвортой хөгжилд хувь нэмрээ оруулахаар зорьж буй бөгөөд олон нийтийн санхүүгийн боловсрол, нийгмийн сайн сайханд чиглэсэн цогц төсөл хөтөлбөр хэрэгжүүлж, бусдадаа үлгэр дуурайл болж чадсан нь энэхүү нэр хүндтэй шагналыг хүртэх гол үзүүлэлт болсон гэж үзэж байна.

ХААН Банканд итгэл хүлээлгэн хамтран ажилладаг нийт харилцагчид, түншүүд мөн ажилтнууддаа баярлалаа.